གངས་ཁྲོད་དུ་རྒྱུ་བའི་གླུ་དབྱངས།

སྟོད་གངས་དཀར་རི་བོའི་རྩེ་མོ་ན།།
སེང་དཀར་མོ་གསུམ་གྱིས་གཡུ་རལ་ངོམ།།
མགོ་གཡུ་རལ་མ་བདེ་མ་ཡིན་ཏེ།།
ལུས་དཔའ་སྟོབས་རྫོགས་པའི་རྟགས་མཚན་རེད།།

བར་རྫ་རི་སྨུག་པོའི་སྐེད་པ་ན།།
སྟག་ཤ་ར་གསུམ་གྱིས་ཀི་སྐོར་བྱེད།།
ལས་རླུང་རྟ་རྒུད་པ་མ་ཡིན་ཏེ།།
ཞེ་སྡང་སའི་དགྲ་ཞིག་ཡོད་རྟགས་རེད།།

སྨད་སྤང་ལྗོངས་སྔོན་མོའི་དང་ཁུག་ན།།
མ་བུ་མོ་གསུམ་གྱིས་མགྲིན་གླུ་ལེན།།
སེམས་སྣང་བ་སྐྱིད་པ་མ་ཡིན་ཏེ།།
ཡིད་ཤོར་སའི་རོགས་རེ་ཡོད་རྟགས་རེད།།

༢༠༠༧ ལོའི་ཟླ་༨ པའི་ཚེས་༢༤ ཕྱི་དྲོ་རྨེ་བ་རྫོང་མཁར་ནས་བྲིས།

ལག་ཁྱེར་ཁ་པར་དང་འབྲེལ་བའི་རྒྱུན་ཤེས་གལ་ཆེན།

ལག་ཁྱེར་ཁ་པར་གྱིས་བརྡ་འཕྲིན་སྐྱེལ་ལེན་བྱེད་སྟངས་ནི། སྐུད་ལྡན་ཁ་པར་དང་ཡེ་ནས་མི་འདྲ་ཞིང་འདི་ལ་བཟང་ས་ངན་ས་གཉིས་ཡོད། བཟང་ཕྱོགས་ནི་སྟབས་བདེ་ཡིན་པ་སོགས་ཚང་མས་དངོས་མཐོང་ལག་ཟིན་གྱི་དགེ་མཚན་དག་རེད།
ལག་ཁྱེར་ཁ་པར་གྱིས་བརྡ་འཕྲིན་སྐྱེལ་ལེན་བྱེད་སྐབས་བརྡ་རྟགས་སྐྱེལ་ལེན་ས་ཚིགས་ཀྱིས་བསྟུད་མར་སྐྱེད་བཞིན་པའི་རྡུལ་ཕྲན་འོད་རླབས་ལ་བརྟེན་གྱི་འོད། དེ་བས་ལག་ཁྱེར་ཁ་པར་དང་བརྡ་རྟགས་སྐྱེལ་ལེན་ས་ཚིགས་གཉིས་བར་གྱི་སྤྱི་མཐུན་བརྡ་སྤྲོད་སྐད་རིགས་ནི་གློག་རྡུལ་འོད་རླབས་ཡིན། ལག་ཁྱེར་ཁ་པར་གྱིས་རྡུལ་ཕྲན་འོད་རླབས་དེ་ང་ཚོས་ཁ་པར་གཏོང་སྐབས་ཁོ་ནར་སྐྱེད་པ་ཙམ་མིན། ཁ་པར་གྱིས་ང་ཚོར་ཚུར་སླེབས་པའི་འཕྲིན་ཐུང་དང་ཁ་པར་སོགས་དུས་ལྟར་ལེན་ཐུབ་ཆེད། རྒྱུན་ཆད་མེད་པར་རྡུལ་ཕྲན་འོད་རླབས་སྐྱེད་ཀྱི་ཡོད། སྐབས་འདིར་བསྐྱེད་པའི་རྡུལ་ཕྲན་འོད་རླབས་ང་ཚོས་ཁ་པར་གཏོང་བཞིན་པའི་སྐབས་སུ་བསྐྱེད་པའི་འོད་རླབས་ནང་བཞིན་གྱི་ནུས་ཤུགས་མེད་ཀྱང་། འདིས་བསྐྱེད་པའི་འོད་རླབས་ལ་བདེ་ཐང་ཐད་ཉེན་ཁ་མེད་པ་མིན།
འཕྲོད་བསྟེན་ཚན་རིག་མཁས་པས་ཁུངས་སྐྱེལ་བྱས་པ་ལྟར་ན། གལ་སྲིད་ཁྱེད་ཀྱིས་ཁ་པར་བྲང་ཁུག་ཏུ་བཅུག་ན། དེས་སྙིང་གི་འཕར་ཚད་ལ་ཤུགས་རྐྱེན་ཐེབས་ཏེ། སྙིང་གཟེར་གྱི་ན་ཚ་སྐྱེད་པའི་ཉེན་ཁ་ཡོད་ལ། དེ་བཞིན་ཁྱེད་ཀྱིས་གློ་ཁུག་ཏུ་བཅུག་ན་མཁལ་མའི་ན་ཚ་སྐྱེད་པ་སོགས་མདོར་ན་ང་ཚོའི་གཟུགས་པོའི་དོན་ལྔ་གང་དང་ཉེ་སར་ཡུན་རིང་ལ་བཞག་ན་དེ་ལ་ན་ཚད་བཟོ་བའི་ཉེན་ཀ་ཚད་མཐོ་ཚུལ་བཀོད་ཡོད། ལྷག་པར་དུ་གཞོན་སྐྱེས་ཚོས་དོ་སྣང་བྱེད་དགོས་ས་ཞིག་ནི། བུད་མེད་ལ་མཚོན་ན་འདི་ནུ་མའི་སྟེང་དུ་ཉར་མི་རུང་ལ། གལ་ཏེ་དེ་ལྟར་བྱས་ན་ནུ་མར་གན་ཌིའི་ན་ཚ་སྐྱེད་པ་དང་། སྐྱེས་པར་མཚོན་ན་ཕོ་མཚན་དང་ཉེ་སར་ཉར་མི་རུང་། གལ་ཏེ་དེ་ལྟར་བྱས་ན་ས་བོན་སྐེམ་པར་བྱེད་ལ། དེ་ལས་ཀྱང་ཚབས་ཆེ་བ་ནི་མཚན་མའི་ཁྱད་ནུས་རྦད་དེ་འགོག་སྲིད་པ་དེ་རེད།
སྤྱིར་འཕྲོད་བསྟེན་ལས་རིགས་པ་ཚོས་ཁ་པར་གྱིས་ཀླད་པ་གཙོ་བྱས་པའི་ང་ཚོའི་གཟུགས་གཞིར་སྐྱོན་བཟོ་བའི་སྐོར་གྱི་སྙན་ཐོ་དང་བཅས་ལོ་སྣེར་ལོ་བསྟུད་དེ་ཁྲིམས་གཏུགས་བྱས་ཀྱང་། དེང་གི་འཛམ་གླིང་འདིར་དངུལ་གྱིས་མི་འགྲུབ་པའི་བྱ་བ་ཕལ་ཆེར་སྲིད་མཐའ་ཙམ་ཡིན་ལ། ནང་སྒོས་སུ་ལག་ཁྱེར་ཁ་པར་གྱི་བཟོ་ཚོང་སྡེ་ཁག་རྣམས་ཧ་ཅང་རྒྱུ་སྟོབས་ཆེ་བས། ད་བར་གནད་ལ་འཁེལ་བའི་ཐག་གཅོད་བྱེད་ཐུབ་མེད། ནུབ་ཕྱོགས་སུ་ལག་ཁྱེར་ཁ་པར་གྱིས་སྤྱོད་མཁན་གྱི་ཀླད་པར་སྐྱོན་བཟོས་རྐྱེན། འབྲེལ་ཡོད་བཟོ་ཚོང་སྡེ་དག་ནས་ཨ་སྒོར་ས་ཡ་མང་བོའི་གུན་གསབ་སྤྲོད་དགོས་བྱུང་བའི་གནས་ཚུལ་ཡོད་མོད། གཞུང་འབྲེལ་གྱི་ཐོག་ནས་གནས་ཚུལ་དེ་དག་ཚད་འཛིན་སར་ངོས་འཛིན་བྱེད་ཀྱི་མེད།
ཡང་གཅིག་བཤད་ན། ང་ཚོ་ནི་འཕྲུལ་རིག་གི་དུས་རབས་སུ་སྐྱེས་པ་ཡིན་པས་འཕྲུལ་ཆས་འདི་རིགས་ཡོངས་སུ་སྤོང་ཐུབ་པ་དཀའ་མོ་རེད། འོན་ཀྱང་ང་ཚོར་མཚོན་ན། རང་ཉིད་ཀྱི་བདེ་ཐང་ལ་གནོད་འཚེ་ཐེབས་ཚེ། ཨ་སྒོར་ས་ཡ་འགའ་ཕར་ཞོག་ཚུར་དགོངས་སེལ་ཞུ་མཁན་ཡང་མེད་ལ་དེ་འདྲ་ཡོད་པའི་དབང་དུ་བཏང་ཡང་མི་ལུས་འདི་གང་གིས་ཀྱང་སླར་ཉོ་ཐབས་མེད། དེ་བས་ཐབས་ཤེས་ལེགས་ཤོས་ནི་ལག་ཁྱེར་ཁ་པར་འདི་ལོགས་སུ་ཁུག་མ་ཞིག་གི་ནང་དུ་འཁྱེར་ན་གོང་བཀོད་ཀྱི་ཉེན་ཁ་དག་ལས་གཡོལ་སྲིད།

པེ་ཅིན་མཁར་གྱི་མགྱོགས་བྲིས།

འུར་སྒྲོག་བྱས་པའི་དཔའ་བོའི་རྡོ་རིང་དང་།།
རྒྱང་དུ་གྲགས་པའི་གནམ་མཆོད་སྟེགས་བུ་དང་།།
ཁྲག་གིས་བཞེངས་པའི་སྒོ་མོའི་ཐང་ཆེན་སོགས།།
མཐོང་ཚེ་མ་ངེས་ཚོར་བས་མིག་ཆུ་ཤོར།།

ལྷ་ཡིས་བཏུང་ན་བདུད་རྩིར་གྲགས་པའི་ཆུ།།
དམྱལ་ཁམས་པ་ལ་ཁྲོ་ཆུ་ཡིན་རབས་གསུང་།།
གཅིག་གི་ཕུན་ཚོགས་གཅིག་གི་རྒུད་བྱེད་དུ།།
གྲུབ་པ་འདི་ལ་ཆོས་ཉིད་ཅེས་ཀྱང་འབོད།།

འགྱུར་འགྲོས་རྦ་རླབས་ལྡིང་བའི་དུས་རབས་འདིར།།
རྟ་རྗེས་བོང་བུས་མིན་རབས་བརྗོད་མོད་ཀྱང་།།
སྔོན་ཐོན་གྲས་སུ་འཚང་བའི་མི་རིགས་འདིའི།།
བྱུང་བ་རང་རེ་ལས་ནི་ལྷག་མི་གདའ།།

དེ་བས་ཏི་སེ་གངས་ལས་མཆེད་པའི་བུ་།།
རྨིག་བཞི་སྒྲོག་ལ་ཚུད་པ་བདེན་མོད་ཀྱང་།།
སྔོན་གཤེགས་དཔའ་བོའི་འགྱུར་མེད་རེ་བཞག་སྟེ།།
རྟ་ནག་སྒྲོག་འགྲོས་རྣམ་ཐར་སྐྱོང་བར་རིགས།།

སྒྲུབ་ན་མི་འགྲུབ་བྱ་བ་ཕལ་ཆེར་མེད།།
མ་བསྒྲུབས་ལོ་བརྒྱས་དོན་གཅིག་འགྲུབ་མ་ཡིན།།
དེ་ལྟར་བསམ་ན་ཤེས་ལྡན་གསར་བུ་ཚོ།།
ཤེས་ཡོན་ཆུད་ཟོས་གཏོང་བའི་དུས་མ་ཡིན།།

ཡར་ཀླུང་གཙང་བོའི་འགྲམ་ནས་མཆེད་པའི་བུ།།
ཁྲག་རྒྱུན་རྩམ་ཁུ་འདྲེས་པར་ངོ་མ་གནོངས།།
མཐོ་བ་གནམ་དང་དམའ་བ་ས་གཞིའི་བར།།
རང་ཚུགས་ཐུབ་ན་རང་ཉིད་དཔོན་པོ་ཡིན།།

བཤད་བཤད་རང་གི་མཚང་ལ་ཕོག་མོད་ཀྱང་།།
མ་བཤད་ཁོག་ཏུ་བསྐུངས་ཀྱང་དགོས་པ་ཆུང་།།
བཤད་བཤད་དོན་ལ་འཁེལ་བ་དཀའ་མོད་ཀྱང་།།
མ་བཤད་དེ་བས་འཁེལ་ཐབས་ག་ལ་ཡོད།།

པེ་ཅིན་རྒྱལ་སྤྱིའི་མགྲོན་ཁང་ཆེན་མོ་ནས་༢༠༠༧ལོའི་ཟླ་༤ཚེས་༡༨ཉིན་བྲིས།

ཐེ་བྲག་པས་རང་ས་བཟུང་།

༄༅། །ཁོ་བོས་སྔོན་ནས་དྲ་ཚིགས་འདྲ་མིན་དང་པོད་ཁུག་འདྲ་མིན་དུ་དྲ་རྩོམ་དང་དྲན་ཚུལ་མང་བོ་སྤེལ་མྱོང་ནའང་། ད་བར་དུ་ཕལ་ཆེར་ཡོད་ཚད་རང་ཉིད་ལ་དབང་བའི་དྲ་དེབ་ཅིག་བཟོ་ཁོམ་མ་མྱུང་། འོན་ཀྱང་། དེ་རིང་ཐུག་སྟངས་ཤིག་གིས་དྲ་དེབ་བམ་པོད་ཁུག་ཞབས་འདེབས་དྲ་ཚིགས་འདི་དང་ཐུག་པས། དེ་མ་ཐག་དང་བ་འདྲེན་པ་ཞིག་ཡིན་པ་རྟོགས།
གྲོགས་པོ་ཚོ། ཁོ་བོས་འདིར་གཙོ་བོ་རང་ཉིད་ཀྱི་ཉིན་རེའི་འཚོ་བའི་ཁྲོད་དང་། དྲ་ཚིགས་དང་དཔེ་དེབ་ཐོག་ནས་རྙེད་པའི་ཉམས་མྱོང་དང་རྟོགས་སད་ཐད་ཀར་འགོད་འདོད་ཡོད། སྤྱིར་ང་ཚོ་གདོང་དམར་པར་མཚོན་ན་མི་རིགས་ཀྱི་བདེ་སྡུག་གླེང་རྒྱུ་ནི་མགོ་ནག་ལྟོ་ལ་བརྟེན་པ་ལྟར་རང་ཆས་སུ་ཡོད་མོད། གནས་དུས་ཀྱི་དབང་གིས་བཤད་འདོད་པའི་སྐད་ཆར་ཚད་བཀག་ལོས་ཡོད།
དེ་ལྟ་ནའང་། མི་རེ་རེས་ནུས་པ་རེ་རེ་བཏོན་ཡོང་ན། ང་ཚོའི་མི་རིགས་སྐད་ཡིག་དང་བཅས་པ་འཛམ་གླིང་མི་སྡེ་འདིར་མུ་མཐུད་དུ་མགོ་འཕང་མཐོན་པོས་གནས་ཐུབ་པར་གདོན་མི་ཟ། དེ་ལྟར་མ་བྱས་ན་ནམ་ཞིག་ང་ཚོ་ང་ཚོའི་ཕྱི་རབས་པ་ཚོར་ངོ་ནོངས་དགོས་པའི་དུས་ཤིག་སླེབས་མི་སྲིད་ཅེས་སུས་བཤད་ནུས།
ཡ་ད་དེ་རིང་འདི་ལྟ་བུ་ཞིག་བྱེད། མ་འོངས་པར་མུ་མཐུད་དུ་སྤེལ།
འོ་རེད། སྤྱིར་དྲང་བདེན་གྱི་སྐད་ཆ་བཤད་དགོས་པ་སྨྲོས་མེད་ཀྱང་། འོན་ཀྱང་། དོན་དག་ཆེན་པོ་མེད་སར་དྲ་ཚིགས་བཀག་འགོག་མི་ཡོང་ཆེད་ཁོ་བོའི་དྲ་ཐོག་ཏུ་གནས་ཡུལ་རྒྱལ་ཁབ་ཀྱི་ཡུལ་ཁྲིམས་དང་འགལ་བའི་གནས་ཚུལ་མི་སྤེལ་བར་མཁྱེན། ང་ཚོས་མི་འགའ་རེའི་སེམས་རྒྱ་ཆེ་ཆུང་མི་ཤེས་པ་མ་རེད།

ཐུགས་རྗེ་ཆེ།