བོད་ཡིག་གཏག་ཚུལ་གཅིག་གྱུར་གཏོང་རྒྱུའི་རེ་ཞུ།

ང་ ཚོའི་མེས་པོའི་ཤུལ་བཞག་གི་སྐད་ཡིག་གཙང་མ་འདི་ཉིད་དེང་གི་འཛམ་གླིང་འཕེལ་ རྒྱས་ཀྱི་འགྲོས་དང་བསྟུན་ནས་ཆ་འཕྲིན་ལམ་དུ་བསྐྱོད་དང་སྐྱོད་བཞིན་པ་འདི་ནི་ ང་ཚོ་བོད་མི་ཡོངས་ཀྱི་ང་རྒྱལ་དང་གཟི་བརྗིད་རེད་ལ། ཁྱད་ པར་དུ་ཁྱེད་ཚོ་སྐད་ཡིག་འཛིན་སྐྱོང་སྤེལ་གསུམ་གྱི་བྱ་བ་རླབས་པོ་ཆེར་ཐུགས་ ཁུར་གནང་བའི་ཤེས་ལྡན་མི་སྣ་ཀུན་གྱི་མཛད་རྗེས་གལ་ཆེན་ཞིག་རེད། བོད་ ཀྱི་སྐད་ཡིག་ཆ་འཕྲིན་ལམ་དུ་བསྐྱོད་པ་ནས་བཟུང་། རང་རེའི་བོད་ཀྱི་རིག་གནས་རྒྱུད་འཛིན་དང་གོང་སྤེལ། བོད་ཀྱི་སྤྱི་ཚོགས་འཕེལ་རྒྱས། རྒྱལ་ཕྱི་ནང་གི་བོད་རིགས་སྤུན་ཟླའི་བར་གྱི་མཛའ་འབྲེལ་སོགས་ཕྱོགས་གང་ཐད་ནས་ ནུས་པ་ཆེན་པོ་འདོན་སྤེལ་བྱེད་ཐུབ་ཡོད། ཡིན་ ནའང་དེང་སང་བོད་ཡིག་མཉེན་ཆས་གང་མང་ཞིག་གསར་གཏོད་བྱེད་པའི་ཁྲོད་རྙོག་འཛིང་གི་ རང་བཞིན་རྒྱུན་མི་ཆད་པ་ཞིག་ཡོད་པ་ནི། བོད་ཡིག་མཉེན་ཆས་སྣ་ཚོགས་དར་བ་དང་མཉམ་དུ་བོད་ཡིག་གཏག་ཚུལ་ཡང་རྣམ་པ་སྣ་ཚོགས་ ཤིག་ཡོད་པས་ང་ཚོ་བོད་ཡིག་བཀོལ་མཁན་དག་ལ་དཀའ་གནད་མང་པོ་ཞིག་འཕྲད་ཀྱིན་ཡོད། དཔེར་ན། པཎ་ཊི་ཏ་བཀོལ་མཁན་ཞིག་གིས་ད་དུང་ཧི་མ་ལ་ཡ་དང་སམ་བྷོ་ཊ། དབྱངས་ཅན། དོན་ཡོད་སོགས་གཞན་དག་གི་མཉེན་ཆས་བཀོལ་མི་ཤེས་པ་དང་། སམ་བྷོ་ཊ་བཀོལ་མཁན་གྱིས་ཧི་གཟུགས་དང་པཎ་གཟུགས་སོགས་བཀོལ་མི་ཤེས་པ། ཧི་ གཟུགས་བཀོལ་མཁན་གྱི་པཎ་གཟུགས་དང་དོན་ཡོད་སོགས་གཞན་དག་གི་མཉེན་ཆས་བཀོལ་མི་ ཤེས་པ་སོགས་སྤྱིར་ན་བོད་ཡིག་གཅིག་པ་ཡིན་རུང་གཏག་ཚུལ་མི་འདྲ་བའི་རྐྱེན་གྱིས་ ཡིག་ཆ་སྣ་ཚོགས་ཐག་གཅོད་དང་པར་སྐྲུན་བྱེད་པ། དྲ་རྒྱ་ལྟ་བ། ཟིན་བྲིས་སྤེལ་བ། སྐད་འཇོག་པ་སོགས་ཀྱི་ཐད་ལ་དཀའ་གནད་དང་རྙོག་འཛིང་ཧ་ཅང་ཆེན་པོ་ཞིག་འདུག། དེའི་ ཕྱིར་ན་བོད་ཡིག་མཉེན་ཆས་ཅི་ཙམ་མང་པོ་ཞིག་གསར་གཏོད་བྱས་ན་དེ་ལས་ཀྱང་བཟང་མོད་ ཡི་གེ་གཏག་ཚུལ་ཐད་ནས་གཅིག་གྱུར་མ་བྱས་ཐབས་མེད་དང་གལ་ཏེ་གཅིག་གྱུར་བྱས་ན་ བོད་ཡིག་བཀོལ་མཁན་ཚོ་ལའང་སྟབས་བདེ་བ་དང་རང་རེའི་བོད་ཀྱི་སྐད་ཡིག་བཟང་པོ་ འདི་ཆ་འཕྲིན་ལམ་ནས་བདེ་བླག་ངང་འཕེལ་རྒྱས་འགྲོ་བར་དགེ་མཚན་ཆེན་པོ་འདུག་སྟེ།

༡ ༽ཧི་མ་ཡ་དང་སྨོན་ལམ་གསུམ་པ་ནི་རྒྱལ་སྤྱིའི་ཚད་ལྡན་ཨང་སྒྲིག་ནང་དུ་འཇུག་ཐུབ་ ཡོད་པ་དང་། འདིའི་ཡི་གེ་གཏག་བདེ་བ། རྩིས་འཁོར་གྱི་མ་ལག་དང་དྲ་རྒྱ་སོགས་ནས་གང་མོས་སུ་བཀོལ་སྤྱོད་གཏོང་ཐུབ་པའི་ ཁྱད་ཆོས་ལྡན་པས། གལ་སྲིད་དེང་སང་གི་པཎ་གཟུགས་དང་སམ་བྷོ་ཊ། དབྱངས་ཅན། དོན་ ཡོད་སོགས་ཡིག་གཟུགས་འདི་ཐམས་ཅད་ཧི་གཟུགས་གཅིག་པུའི་ཁོངས་སུ་བསྡུ་རྒྱུ་དང་ ཡི་གེའི་གཏག་ཚུལ་ཡང་ཧི་གཟུགས་ཀྱི་གཏག་ཚུལ་དང་གཅིག་མཚུངས་ཐུབ་ན། ཡིག་གཟུགས་དེ་དག་ཧི་མ་ལ་ཡ་དང་སྨོན་ལམ་གསུམ་པ་ནང་བཞིན་དུ་ཁྱབ་རྒྱ་ཆེན་པོ་ གཏོང་ཐུབ།

༢ ༽བོད་ཡིག་ལ་དབྱངས་གསལ་སོ་བཞི་ལས་མེད་པ་དང་འདི་ནི་འཛམ་གླིང་སྔོན་ཐོན་གྱི་ སྒྲ་ལྡན་ཡིག་རིགས་ཡིན་ཕྱིན་འདིའི་གཏག་ཚུལ་ཡང་དབྱིན་ཡིག་ལྟ་བུའི་འཐེབ་གཞོང་ གི་སྒྲིག་བཀོད་གཅིག་གྱུར་བྱེད་པ་ལས་འདྲ་གཟུགས་ཡི་གེ་རྒྱ་ཡིག་ལྟ་བུའི༼五笔输入、智能ABC、郑码、全拼、双拼༽ལྟ་བུའི་གཏག་ཚུལ་འདྲ་མིན་སྣ་ཚོགས་དགོས་དོན་གཏན་ནས་མེད། འདིས་ ཡིག་འབྲུ་སོ་བཞིའི་གཏག་ཚུལ་རྙོག་འཛིང་ཅན་ཞིག་ཏུ་སྒྱུར་བ་ལས་མི་ཁ་ཤས་ཀྱིས་ བཤད་པ་ལྟ་བུའི་གཏག་ཚུལ་ཅི་ཙམ་མང་ཡང་དེ་ཙམ་གྱི་བོད་ཡིག་སྔོན་ཐོན་གྱི་རྣམ་པ་ མཚོན་པའི་ངེས་པ་ཅི་ཡང་མེད།

༣ ༽བོད་ཡིག་མཉེན་ཆས་འདི་དག་ཧི་གཟུགས་ཀྱི་ཁོངས་སུ་བསྡུ་བ་དང་གཏག་ཚུལ་ཡང་གཅིག་ གྱུར་ཐུབ་ན་བོད་ཡིག་འདི་ཆ་འཕྲིན་ཐད་ནས་བདེ་བླག་ངང་འཕེལ་རྒྱས་འགྲོ་བ་དང་། དཔེར་ན་ཧི་གཟུགས་གཏག་ཤེས་ཚེ་པཎ་གཟུགས་དང་དོན་ཡོད་སོགས་གཞན་དག་གི་ཡིག་གཟུགས་ཚང་མ་གཏག་ཤེས་པ་མ་ཚད། ཡིག་ གཟུགས་ཐད་ནས་རང་གི་དགའ་ཕྱོགས་དང་བསྟུན་ནས་པཎ་གཟུགས་དང་དོན་ཡོད་སོགས་ཀྱི་ ཡིག་གཟུགས་གང་ཞིག་འདེམས་ན་ཆོག་ལ། ཡིག་གེའི་གཏག་ཚུལ་ཐད་ཀྱི་དཀའ་རྙོག་ཐམས་ཅད་ཀྱང་རང་བཞིན་ནས་སེལ་ཐུབ།

༤ ༽གལ་སྲིད་ཧི་གཟུགས་དང་པཎ་གཟུགས་སོགས་ཀྱི་ཡི་གེའི་ཆེ་ཆུང་དང་ཡིག་གཟུགས་སོགས་ གང་ཞིག་རང་གི་དགོས་མཁོ་དང་མི་འཐད་ཚེ་དེ་དག་དྲ་རྒྱའི་ཐོག་ནས་བཀོལ་མཁན་གྱི་ བསམ་འཆར་བསྡུ་ལེན་བྱས་ནས་རིམ་བཞིན་འཐུས་སྒོ་ཇེ་ཚང་དང་ཕུན་སུམ་ཇེ་ཚོགས་སུ་ བཏང་ན་ཆོག།

༥༽བོད་ཡིག་གཏག་ཚུལ་གཅིག་གྱུར་བྱེད་ཐུབ་ན། ང་ཚོ་བཀོལ་མཁན་ལ་ཧ་ཅང་སྟབས་བདེ་བ་མ་ཚད། དེང་ སང་པཎ་གཟུགས་ཁོ་ནར་མཁྲེགས་འཛིན་བྱེད་པའམ། ཧི་གཟུགས་ཁོ་ནར་མཁྲེགས་འཛིན་བྱས་པ། ཡང་ན་དོན་ཡོད་དང་སམ་བྷོ་ཊ་ཁོ་ནར་མཁྲེགས་འཛིན་བྱས་གནད་དོན་སེལ་ཐུབ་ལ། བོད་ཀྱི་མཐུན་སྒྲིལ་དང་བོད་སྐད་གཅིག་གྱུར། མ་འོངས་བོད་ཀྱི་མཉེན་ཆས་གཞན་དག་གསར་གཏོད་བྱེད་པ་སོགས་ལ་གཞི་རྩ་བརྟན་པོ་འཇོག་ཐུབ།

-- <<ཁ་བའི་རང་མདངས་>>ཞེས་པའི་པོད་ཁུག་ལས་བཤུས།

རྒྱ་བོད་དབྱིན་གསུམ་ཤན་སྦྱར་གྱི་གསར་བྱུང་རྒྱུན་བཀོལ་མིང་མཛོད་བལྟ་བསྐུལ་གྱི་སྔོན་བརྡ།

མཁན་ཆེན་ཚུལ་ཁྲིམས་བློ་གྲོས་ཀྱི་གསུང་རྩོམ་ལས་བཏུས།

དྲུག་པ།

ཐ་ སྙད་གཏན་ལ་ཕབ་ཚུལ། མིང་མཛོད་དེ་གཉིས་ཀའི་ནང་དུ་མིང་རྙིང་པ་ཉུང་ཤོས་ཤིག་ཁྱབ་གདལ་དུ་གཏོང་བའི་ ཕྱིར་དུ་བཞག་ཡོད་པ་ལས། གཞན་ཐམས་ཅད་གསར་བྱུང་གི་དངོས་པོའི་ཐ་སྙད་གསར་བ་ཤ་སྟག་ཡིན། ཐ་སྙད་དེ་རྣམས་གཏན་ལ་འབེབས་པ་ན། འགའ་ཞིག་ནི་དངོས་པོ་དེའི་རྒྱུ་འབྲས་སམ་དབྱིབས་ཁ་དོག་བྱེད་ལས་ཐོན་ཡུལ་བཅས་ལ་ བརྟགས་ནས་མིང་གསར་དུ་བཏགས། དེ་ཡང་ཅི་ནུས་ཀྱིས་རང་རེའི་ཕ་མེས་གོང་མ་རྣམས་ཀྱི་མིང་གདགས་ཚུལ་ལྟར་དུ་དོན་ སྟོན་ཞིང་བརྗོད་བདེ་བ་ཡི་གེ་ཉུང་བར་བྱས་སོ། །འགའ་ཞིག་ནི་དབྱིན་ཡིག་དང་རྒྱ་ཡིག་གི་མིང་སྔར་ཡོད་པ་བསྒྱུར། དེ་ཡང་སྒྲ་སྦྱོར་བམ་པོ་གཉིས་པ་ལས་གཏན་ལ་ཕབ་པའི་ཡིག་སྒྱུར་གྱི་ཚུལ་དང༌། དེང་རབས་ཀྱི་ཡིག་སྒྱུར་བྱེད་ཚུལ་ཡོངས་སུ་གྲགས་པ་རྣམས་ལ་བརྟེན་ནས་བསྒྱུར། བསྒྱུར་གཞི་མིང་དེ་སྤྱིར་བཏང་ལ་དངོས་པོ་དེ་ཐོན་ཡུལ་ཕྱི་གླིང་ངམ་རྒྱ་ནག་གང་ ཡིན་གྱི་ཡི་གེ་དབང་བཙན་དུ་བྱས། དམིགས་བསལ་ལ་དོན་དང་གང་འབྱོར་བ་དེ་ཉིད་གཙོ་བོར་བཟུང་ངོ༌། །མིའམ་ས་མིང་སོགས་ཀྱི་ཟུར་ལས་གྲས་པ་ལྟ་བུའི་ཐ་སྙད་ཉུང་ཟད་ཅིག་ནི་གཞན་གྱི་ སྐད་སོར་བཞག་བྱས། དམིགས་བསལ་གྱི་ཐ་སྙད་འགའ་ཞིག་ནི་ཉམས་མཚར་སོགས་ཀྱི་ཆེད་དུ་བོད་སྐད་ཀྱི་དོན་ སྟོན་ཞིང་གཞན་སྐད་ཀྱི་གདངས་མ་མཉམས་པར་བྱས་ཡོད་དོ། །ཐ་སྙད་དེ་རྣམས་ཐམས་ཅད་ཀྱང་སོ་སོའི་རང་ས་ནས་བཟོས་པ་ཙམ་མ་ཡིན་པར་སྒྲིག་པ་པོ་ ཐམས་ཅད་ལྷན་དུ་འདུས་ནས་མིང་རེ་རེ་བཞིན་དུ་བགྲོ་གླེང་ཞིབ་མོར་བྱས་ནས་བརྗོད་ བྱའི་དོན་དང་འབྱོར་མི་འབྱོར། བརྗོད་པ་བདེ་མི་བདེ། བོད་སྤྱིའི་སྐད་དུ་སོང་མ་སོང་སོགས་ལ་བརྟག་དཔྱད་ཡང་ཡང་བྱས་པར་མ་ཟད། བོད་ཆོལ་ཁ་གསུམ་གྱི་ས་གནས་སོ་སོའི་སྐད་ཡིག་ལ་མཁས་པ་རྣམས་ཀྱི་མདུན་དུ་དགོངས་ འཆར་བསྡུ་བའི་ཕྱིར་དུཐོག་མའི་མ་ཟིན་ཕུལ་ཞིང༌། དགོངས་འཆར་གནང་བ་རྣམས་ལ་བླང་དོར་ཚུལ་བཞིན་དུ་བྱས་པ་ཡིན་པས། བརྗོད་བྱའི་དོན་དང་མཐུན་ཞིང་མ་མཐར་ཡང་བོད་མཐའ་དབུས་ཡོངས་ལ་གོ་བརྡ་འཕྲོད་ལ། ཕལ་མོ་ཆེ་ཞིག་བརྗོད་ཀྱང་བདེ། རེ་ཟུང་ཞིག་ཐོག་མར་མི་བདེ་བ་ལྟར་སྣང་ཡང་ཅུང་ཟད་ལོབས་པ་ན་བདེ་བས་ཕལ་ཆེར་ཐ་ སྙད་སྐྱོན་མེད་པ་རེ་ཡིན་པར་སེམས་སོ། །

བདུན་པ།

སྙིང་ ཐག་པའི་རེ་ཞུ། བོད་ཁ་བ་ཅན་གྱི་ཞིང་འབྲོག་མི་མང་བྱིངས་དང་གྲོང་ཁྱེར་གྱི་སྡོད་དམངས། དགོན་པའི་གྲྭ་ཚང༌། སློབ་གྲྭའི་དགེ་རྒན་དང་སློབ་མ། ལས་ཁུངས་སོ་སོའི་མི་སྣ་རྣམས་ལ་སྙིང་ཐག་པ་ནས་ཞུ་བ་ནི། སྐད་ཡིག་ཉམས་ན་རིག་གནས་ཀྱི་རྨང་གཞི་མེད་པས་མི་རིགས་ཀྱི་རིག་གནས་རིང་དུ་མི་ གནས། མི་རིགས་ཀྱི་རིག་གནས་མེད་ན་ཡུལ་སྲོལ་གོམས་གཤིས་དང་བསམ་བློའི་འཁྱེར་སོ། །དད་འདུན་དང་ལོ་རྒྱུས་ཐམས་ཅད་འཇིག་པས་མི་རིགས་དེ་རིང་དུ་མི་གནས། མི་རིགས་ཀྱི་ངོ་བོ་ཉམས་པར་གྱུར་ན། དེའི་རྗེས་ནས་ཡར་རྒྱས་སུ་ཅུང་ཟད་སོང་ཡང༌། དེ་ནི་གཞན་ཞིག་ཡར་རྒྱས་སུ་སོང་བ་ཡིན་གྱི། བོད་མི་རིགས་ཡར་རྒྱས་སུ་སོང་བ་མ་ཡིན་པར་མ་ཟད་མཇུག་རྫོགས་པར་གྱུར་པ་ཡིན་ནོ། །དེས་ན་ཐམས་ཅད་ཀྱི་རྩ་བ་སྐད་ཡིག་ལ་ཐུག་པ་ཤེས་པར་བྱས་ཏེ། སྐད་ཡིག་ལ་གཅེས་འཛིན་བྱ་དགོས། དེ་ཡང་མི་རེ་རེ་བཞིན་དུ་ཐོག་མར་རང་གི་སྟེང་ནས་བསྒྲུབ་དགོས་པས། ད་ནས་བཟུང་རང་སྐད་གཙང་མ་ཞིག་སྨྲ་བར་ཅིས་ཀྱང་ཞུ་ཞུ། མིང་མཛོད་འདི་ཐོག་མར་དེབ་ཁྲི་ཕྲག་གཅིག་དགོན་པ་སོ་སོ་དང༌། སློབ་གྲྭ་ཁག་དང༌། འབྲེལ་ཡོད་ལས་ཁུངས་སོགས་ལ་རིན་མེད་དུ་འབུལ་རྒྱུ་ཡིན་ལ། གཞན་རྣམས་ཀྱང་རིན་གོང་ཅུང་ཟད་ཆུང་བར་བྱས་ཏེ། ས་གནས་སོ་སོའི་དཔེ་ཚོང་ཁང་སོགས་བརྒྱུད་ནས་འགྲེམ་སྤེལ་བྱ་རྒྱུ་ཡིན་པས་བཏང་ སྙོམས་སུ་མི་གཞག་པར་དུས་ཐོག་ཏུ་དོན་གཉེར་གནང་ནས། འདིའི་ཐ་སྙད་རྣམས་ཁོང་དུ་ཆུད་པ་དང་ཁ་ལ་བྱང་བ་ཞིག་བྱེད་པར་སྙིང་ཐག་པ་ནས་ཞུ་ བ་ལགས་སོ།།

བརྒྱད་པ།

སླད་མའི་ཞུ་ གསོལ། གོང་དུ་སྨྲས་པ་བཞིན་མིང་མཛོད་འདི་གཉིས་བསྒྲིག་པའི་བྱ་བའི་ནང་དུ་ཁོ་བོ་ཅག་ གི་རང་ནུས་ཅི་ཡོད་ཀྱིས་ནན་ཏན་བྱེད་ཁུལ་ཡིན་མོད། དེ་ལྟ་ནའང་སྤྱིར་རིག་གནས་ཀྱི་ཚད་ཞན་ཅིང༌། ཁྱད་པར་དུ་མིང་མཛོད་བསྒྲིག་རྒྱུའི་ཉམས་མྱོང་ཆེར་མེད་པ་དང༌། སྐབས་འགར་ནན་ཟབ་བྱེད་རྒྱུས་མ་འདངས་པ་སོགས་ཀྱི་སྐྱོན་ཡང་ཡོད་སྲིད་པས། བོད་ཀྱི་སྐད་ཡིག་གི་ཆེད་ལས་མཁས་པ་སོགས་ཀྱིས་སྐྱོན་ཡོད་པ་དང་མ་འདང་བའི་སྐོར་ ལ་སུན་འབྱིན་དང་ལེགས་བཅོས་ཀྱི་དགོངས་འཆར་དག་ཡིག་ཐོག་གམ་ཁ་པར་སོགས་ཀྱི་ལམ་ ནས་ལྷུག་པར་གནང་བར་མཛད་དུ་གསོལ། དགོངས་འཆར་གྱི་འཕྲིན་ཡིག་བསྐུར་ཡུལ་ལམ་ཁ་པར་ཨང་གྲངས་སམ་དྲྭ་ཡིག་ཁ་བྱང་རྣམས་ མིང་མཛོད་དང་མཉམ་དུ་འབུལ་རྒྱུ་ཡིན་ནོ། །ཞེས་པའང་བོད་རབ་གནས་མེ་ཕག་ཟླ་༡༠པའི་ཚེས་༡༩ཉིན་ཚུལ་ཁྲིམས་བློ་གྲོས་ཀྱིས་གྲོང་ཁྱེར་པདྨ་ཅན་དུ་བྲིས་པའོ། ། ། །

-- <<གཡུ་མདོག་གི་ཕ་ཁྱིམ་>>པོད་ཁུག་ལས་བཤུས།